Kunkolle Ek Mahan Ganv

Pustok Vimorso:
Kunkolle Ek Mahan Ganv

Halinch Pri. Planton Farian ek nazauk , 500 panchem pustok uzvaddailam. Pustokachem nanv - Kunkolle Ek Mahan Ganv.
Hem pustok Goa Konknni Akademichea xikxonnik yevzonne khal 50% arthik adaran chhaplam. Hem kam’ Goa Konknni Akademin kelam mhonn xabaski favo. Pustokachea kovrar tambddo doria pollevn mhaka Kunkollechea martirancho ugddas ailo. Katolk Sobhen 4 padrink ani ek bradar hankam bhagevontkoronn vo beatifikasanv korun altarar choddoileat. Punn tanche sangata tea disa Gõykar 5 griostheank marle, tancher visor poddli hanchi khobor anik kednam-i korchi.
Hem pustok itihasik nodren boroilam. Soglli khobor aplea ganvchea fuddarak ek daiz koxem dovorpak Pri. Farian boroch thokos ghetla. Hem pustok bore toren toyar korunk char vorsam tori taka laglim. Aplea ganvchi khup mahiti tannem dilea. Osli mahiti divnk itihasik pustokam artun portunchim poddtat. Pustok Konknniche Romi lipyent boroilam mhonn Pri. Plantonak odik xabaski. Oxem kelear Konknnichem Sahitya vaddot veta. Hem pustok namnnecheam zannkaramnim vakhannlam zoxem Dr. Pratap Naik baban dakttulo vixvkox (micro encyclopedia) mhonnlam. Tem pustok Kunkollkaranchi ‘direktori’ zaum yeta, oxem Prof. D. L. Naik mhonnta. Pri. Planton Fariak amchim porbim.

Konknni Romi lipyechea kursachem pustok

Konknni Romi lipyechea kursachem pustok

Porvorchea Thomas Stephen’s Konknni Kendrak ani Konknni pondit Pri.Mathew Almeidak, s.j. xabaski favo. Kiteak, Setembrache 29ver, Son’varadis sokallim 10.00 vaztam, tannem toyar kelelem Romi lipyentlean Konknni xikpachem pustok uzvadda yetelem. Dalgado Konknni Akademicho odheokx Xri Tomazinho Cardozachea hatantlean, Thomas Stephens Kendrant hea pustokachi ugtavnni zateli. Hea pustokak lagun Romi lipyentlean ekrupi Konknni borovpak atam sompem zatolem. Oslea pustokachi Konknni xiktoleankuch nhoi, bogor boroitoleank-ui goroz asli.
252 panancheam hea pustokant Konknni veakoronnachi Inglezintlean somzonni dilea. Dor lisanvachea xevottak gorjechi Konknni utravoll (vocabulary) dilea. Toxench Konknni utranche uch’char (pronunciation) dileat. Pustokachem mol 250/- rupia, punn ugtavnnechea disa gheteleank 200/- rupia oxe sovlot doren melltolem.

-------------
Romi Lipint Konknni xikpachea pustokachi ugtavnni
Romi lipin Konknni xikpachem pustok Stephen’s Konknni Kendrachea Dr. Pri. Mathew Almeida-n toyar kelam tachi Dalgado Konknni Akademicho Odheokx Tomazinho Cardozachea hatantlean ugtavnni zali. Hem pustok TSKK-n uzvaddailam. Romi lipin Konknni borovpache nem’ hea pustokant dileat, Konknni bhas xiktoleak tem bhov faideachem. Amche bhaxent jim purtugez ani Inglez utram vapurtat tim toxinch samballunk zai, hem pustok amcheam firgozamnim bhitor kaddun amcheam tornnateank ani herank-ui Konknni xikovnk zai, oxem Xri Tomazinho Cardozo hannem aplea ulovpantlean sanglem. Romi Konknni boroitoleamnim bhas borovpache nem’ bore toren xikpache proytn korche mhonn tannem ulo marlo. Halinch uzvaddailelea Povitr Pustokant ani igorjechea her sahityant vapurtat tea dorjeachi Konknni hea pustokant asa. Hem pustok sogleamnim ghetlear borem zatolem. Tachem mol 250/- rupia.